പൊതുവിൽ ആരോഗ്യപ്ര​ശ്​നങ്ങളുമായി ചികിത്സക്കെത്തുന്ന രോഗികളിൽ ചെറിയൊരു ശതമാനമെങ്കിലും ഡോക്ടർ​മാരോട്​ പറയുന്ന ആവലാതികളിൽ ഒന്നാണ്​ ‘കൈകാലുകളിലെ തരിപ്പ്’ എന്ന അവസ്ഥ. പ്രാദേശിക ഭാഷാവ്യതിയാനമനുസരിച്ച്​ ചുട്ടുനീറ്റൽ, പെരുപ്പ്​, മരവിപ്പ് എന്നെല്ലാം ഇതിനെ വിശേഷിപ്പിക്കാറുണ്ട്​.

മധ്യവയസ്കരിലും പ്രായമേറിയവരിലുമെല്ലാം കണ്ടുവരുന്ന ഈ പ്രശ്നത്തിന്​ പിറകിൽ നിരവധി കാരണങ്ങളുണ്ട്​. ആധുനിക വൈദ്യശാസ്​ത്രം പെരിഫെറൽ ന്യൂറോപ്പതി (Peripheral neuropathy) എന്ന്​ വിളിക്കുന്ന ഈ അവസ്ഥ പൊതുവിൽ ആദ്യം പാദങ്ങളിലും പിന്നീട് കൈകളിലുമാണ്​ അനുഭവപ്പെടുക.

നിയന്ത്രണമില്ലാത്ത പ്രമേഹമുള്ളവരിൽ ധാരാളമായി കണ്ടുവരുന്ന കൈകാലുകളിലെ തരിപ്പ് പാരമ്പര്യ-ജനിതക രോഗങ്ങൾ, വിറ്റമിൻ ഉൾപ്പെടെയുള്ള പോഷകങ്ങളുടെ കുറവ്, വൃക്ക-കരൾ രോഗങ്ങൾ, വാതസംബന്ധ രോഗങ്ങൾ, നട്ടെല്ലിലെ ഡിസ്കുമായി ബന്ധപ്പെട്ട പ്രശ്നങ്ങൾ തുടങ്ങി എയ്​ഡ്​സ്​ പോലുള്ള അണുബാധകൾ മൂലവും ഉണ്ടാവാറുണ്ട്​.

ഇതിനു​പുറമെ മദ്യപാനം, പുകവലി, മയക്കുമരുന്നുകൾ തുടങ്ങിയ ദുശ്ശീലങ്ങൾ ശരീരത്തിൽ സൃഷ്ടിക്കുന്ന ഹാനികരമായ രാസപദാർഥങ്ങൾ മൂലവും വിഷവസ്തുക്കൾ മൂലവും ഈ ലക്ഷണങ്ങൾ പ്രകടമാവാറുണ്ട്​.

എന്താണ്​ ‘പെരിഫെറൽ ന്യൂറോപ്പതി’?

മനുഷ്യ ശരീരത്തിലെ എല്ലാഭാഗങ്ങളെയും നിയന്ത്രിക്കുന്നത് മസ്തിഷ്കമാണ്. മസ്തിഷ്കത്തിലെ സുഷുമ്‌ന നാഡികളില്‍നിന്ന്​ തുടങ്ങി ശരീരത്തിലെ വിവിധ ഭാഗങ്ങളിൽ വ്യാപിച്ചുകിടക്കുന്ന നേർത്ത നാഡികളെയാണ്​ ‘പെരിഫെറല്‍ നാഡികൾ’ എന്ന്​ വിളിക്കുന്നത്​.

അവയവങ്ങളിലെ വേദന, ചൊറിച്ചിൽ, ചൂട്​, തണുപ്പ്​ തുടങ്ങിയ അനുഭവങ്ങളെ ക്ഷണനേരംകൊണ്ട്​ തലച്ചോറില്‍ എത്തിക്കുന്നത്​ ‘പെരിഫെറല്‍ നാഡി’കളാണ്. ഇത്തരം നാഡികൾക്കുണ്ടാവുന്ന ഏറിയും കുറഞ്ഞുമുള്ള തകരാറുകളുടെ ഭാഗമായാണ്​ ‘പെരിഫെറല്‍ ന്യൂറോപ്പതി’യും അതിന്‍റെ ലക്ഷണമായി കൈകാലുകളിൽ തരിപ്പും മരവിപ്പും അനുഭവപ്പെടുന്നത്​.

രാവിലെ ഉറങ്ങി എഴുന്നേറ്റാലുടൻ നിൽക്കാനും നടക്കാനും പ്രയാസം, ചൂടുള്ളതും തണുപ്പുള്ളതുമായ വസ്തുക്കളിൽ സ്പർശിക്കുമ്പോഴുണ്ടാവുന്ന അസഹ്യമായ അസ്വസ്ഥതകൾ തുടങ്ങിയവയാണ്​ ​പ്രധാന രോഗലക്ഷണങ്ങൾ. എന്നാലും ഒരു വിദഗ്​ധ ഡോക്ടറുടെ പരിശോധനയിലൂടെ മാത്രമേ രോഗനിർണയം സാധ്യമാകൂ. രോഗകാരണം കണ്ടെത്തിയുള്ള ചികിത്സയാണ്​ അഭികാമ്യം.

രോഗകാരണങ്ങൾ

ദീർഘകാലം രക്തത്തില്‍ ഗ്ലൂക്കോസിന്‍റെ അളവ്​ കൂടി നില്‍ക്കുന്ന ഭൂരിപക്ഷം പ്രമേഹരോഗികളിലും ഈ അവസ്ഥ കണ്ടുവരുന്നുണ്ട്​. രക്തത്തിലെ ഗ്ലൂക്കോസിന്‍റെ ഉയർന്നനില കാലക്രമേണ നാഡികളെ തകരാറിലാക്കുന്നതിനാലും ഞരമ്പുകളിലേക്ക് ആവ​ശ്യത്തിന് രക്തം ലഭിക്കാത്തതിനാലും അവയവങ്ങളിലെ സംവേദനക്ഷമത നഷ്ടപ്പെട്ട്​ കൈകാലുകളിൽ മരവിപ്പും തരിപ്പും തൊട്ടാൽ അറിയാത്ത അവസ്ഥയുമെല്ലാം അനുഭവപ്പെടാം.

ഇതിന്​ പുറമെയാണ്​ ജീവകങ്ങളുടെ (വിറ്റമിൻ) കുറവ്​ കൊണ്ടുണ്ടാകുന്ന പ്രശ്നങ്ങൾ. വിറ്റമിൻ-ബി കോംപ്ലക്സ്​, വിറ്റമിൻ-ഡി, ഇ എന്നിവയുടെ കുറവുകൊണ്ടും അവയവങ്ങളിൽ തരിപ്പും മരവിപ്പും അനുഭവപ്പെടാം​. തൈറോയ്​ഡ്​ രോഗങ്ങൾ, വൃക്കരോഗങ്ങൾ എന്നിവ ഉള്ളവർക്കും ചില മരുന്നുകളുടെ പാർശ്വഫലമായും ഇങ്ങനെ സംഭവിക്കാം.

കൂടാതെ പുകവലി, മദ്യപാനം, മയക്കുമരുന്ന്​ ഉപയോഗം തുടങ്ങിയവമൂലം ശരീരത്തിലുണ്ടാവുന്ന വിഷാംശങ്ങൾ അടങ്ങിയ രാസപദാർഥങ്ങളുടെ ഫലമായും തരിപ്പും മരവിപ്പും മറ്റും അനുഭവപ്പെടാറുണ്ട്​.

രോഗനിർണയം

ലക്ഷണങ്ങൾ മനസ്സിലാക്കിയും ശാരീരിക പരിശോധനയിലൂടെയും വിദഗ്​ധനായ ഒരു ഡോക്ടർക്ക്​ ഒരു പരിധിവരെ രോഗനിർണയം നടത്താവുന്നതാണ്​. ഇതിന്​ പുറമെ ഉപകരണങ്ങളുടെ സഹായത്തോടെ നടത്തുന്ന ഞരമ്പുകളുടെ സംവേദനക്ഷമത പരിശോധന (Nerve conduction study), എം.ആർ.ഐ സ്കാൻ തുടങ്ങിയ പരിശോധനകളും രോഗനിർണയത്തിന്‍റെ ഭാഗമായി നടത്താറുണ്ട്​.

ചികിത്സ മാർഗങ്ങൾ

രോഗനിർണയം നടത്തിക്കഴിഞ്ഞാൽ അസുഖത്തിന്‍റെ കാരണത്തിനുൾപ്പെടെയാണ്​​ ചികിത്സ നൽകുക. ​ഉദാഹരണത്തിന്,​ പ്രമേഹരോഗികളിൽ രക്തത്തിലെ ഗ്ലൂക്കോസിന്‍റെ അളവ്​ ക്രമീകരിക്കുന്നതിനൊപ്പമാണ്​ ‘പെരിഫെറൽ ന്യൂറോപ്പതി’ക്കുള്ള മരുന്നുകൾ നൽകുക.

വിറ്റമിനുകളുടെ കുറവുമൂലമുള്ള ബുദ്ധിമുട്ടുകൾക്ക്​ ആവശ്യത്തിന്​ വിറ്റമിനുകളും ആഹാരക്രമീകരണവുമാണ്​ നിർദേശിക്കുക. മരുന്നുകൾതന്നെയാണ് ആദ്യ ഘട്ടത്തിൽ നൽകുക. പല കേസുകളിലും അത് മതിയാകുമെങ്കിലും ചില ന്യൂറോപ്പതികളിൽ ശസ്​ത്രക്രിയയും ആവശ്യമായിവരും.

ഇതിനൊപ്പം വ്യായാമം, ഫിസിയോതെറപ്പി തുടങ്ങിയവയും മികച്ച ഫലം നൽകും. തുടക്കത്തിൽതന്നെ ചികിത്സിക്കുന്നത്​ ​വേഗത്തിൽ രോഗശമനത്തിന്​ സഹായിക്കും.